Valmiki Ramayanam - Balakanda - Part 20

శ్రీమద్వాల్మీకియరామాయణే బాలకాండే అష్టషష్ఠితమః సర్గః |౧-౬౮|
జనకేన సమాదిష్టా దూతాః తే క్లాంత వాహనాః |
త్రి రాత్రం ఉషితా మార్గే తే అయోధ్యాం ప్రావిశన్ పురీం |౧-౬౮-౧|
తే రాజ వచనాత్ గత్వా రాజవేశ్మ ప్రవేశితాః |
దదృశుః దేవ సంకాశం వృద్ధం దశరథం నృపం |౧-౬౮-౨|
బద్ధ అంజలి పుటాః సర్వే దూతా విగత సాధ్వసాః |
రాజానం ప్రశ్రితం వాక్యం అబ్రువన్ మధుర అక్షరం |౧-౬౮-౩|
మైథిలో జనకో రాజా స అగ్ని హోత్ర పురస్కృతః |
ముహుర్ ముహుర్ మధురయా స్నేహ సంరక్తయా గిరా |౧-౬౮-౪|
కుశలం చ అవ్యయం చైవ స ఉపాధ్యాయ పురోహితం |
జనకః త్వాం మహారాజ పృచ్ఛతే స పురః సరం |౧-౬౮-౫|
పృష్ట్వా కుశలం అవ్యగ్రం వైదేహో మిథిలాధిపః |
కౌశిక అనుమతే వాక్యం భవంతం ఇదం అబ్రవీత్ |౧-౬౮-౬|
పూర్వం ప్రతిజ్ఞా విదితా వీర్య శుల్కా మమ ఆత్మజా |
రాజానః చ కృత అమర్షా నిర్వీర్యా విముఖీ కృతాః |౧-౬౮-౭|
సా ఇయం మమ సుతా రాజన్ విశ్వామిత్ర పురస్కృతైః |
యదృచ్ఛయా ఆగతైః వీరైః నిర్జితా తవ పుత్రకైః |౧-౬౮-౮|
తత్ చ రత్నం ధనుర్ దివ్యం మధ్యే భగ్నం మహాత్మనా |
రామేణ హి మహాబాహో మహత్యాం జన సంసది |౧-౬౮-౯|
అస్మై దేయా మయా సీతా వీర్య శుల్కా మహాత్మనే |
ప్రతిజ్ఞాం తర్తుం ఇచ్ఛామి తత్ అనుజ్ఞాతుం అర్హసి |౧-౬౮-౧౦|
స ఉపాధ్యాయో మహారాజ పురోహిత పురస్కృతః |
శీఘ్రం ఆగచ్ఛ భద్రం తే ద్రష్టుం అర్హసి రాఘవౌ |౧-౬౮-౧౧|
ప్రతిజ్ఞాం మమ రాజేంద్ర నిర్వర్తయితుం అర్హసి |
పుత్రయోః ఉభయోః ఏవ ప్రీతిం త్వం అపి లప్స్యసే |౧-౬౮-౧౨|
ఏవం విదేహ అధిపతిః మధురం వాక్యం అబ్రవీత్ |
విశ్వామిత్ర అభ్యనుజ్ఞాతః శతానంద మతే స్థితః |౧-౬౮-౧౩|
దూత వాక్యం తు తత్ శ్రుత్వా రాజా పరమ హర్షితః |
వసిష్ఠం వామదేవం చ మంత్రిణః చ ఏవం అబ్రవీత్ |౧-౬౮-౧౪|
గుప్తః కుశిక పుత్రేణ కౌసల్య ఆనంద వర్ధనః |
లక్ష్మణేన సహ భ్రాత్రా విదేహేషు వసతి అసౌ |౧-౬౮-౧౫|
దృష్ట వీర్యః తు కాకుత్స్థో జనకేన మహాత్మనా |
సంప్రదానం సుతాయాః తు రాఘవే కర్తుం ఇచ్ఛతి |౧-౬౮-౧౬|
యది వో రోచతే వృత్తం జనకస్య మహాత్మనః |
పురీం గచ్ఛామహే శీఘ్రం మా భూత్ కాలస్య పర్యయః |౧-౬౮-౧౭|
మంత్రిణో బాఢం ఇతి ఆహుః సహ సర్వైః మహర్షిభిః |
సు ప్రీతః చ అబ్రవీత్ రాజా శ్వః యాత్రా ఇతి చ మంత్రిణః |౧-౬౮-౧౮|
మంత్రిణః తు నరేంద్రస్య రాత్రిం పరమ సత్కృతాః |
ఊషుః ప్రముదితాః సర్వే గుణైః సర్వైః సమన్వితాః |౧-౬౮-౧౯|

ఇతి వాల్మీకి రామాయణే ఆది కావ్యే బాలకాండే అష్టషష్ఠితమః సర్గః |౧-౬౮|



శ్రీమద్వాల్మీకియరామాయణే బాలకాండే ఏకోనసప్తతితమః సర్గః |౧-౬౯|
తతో రాత్ర్యాం వ్యతీతాయాం స ఉపాధ్యాయః స బాంధవః |
రాజా దశరథో హృష్టః సుమంత్రం ఇదం అబ్రవీత్ |౧-౬౯-౧|
అద్య సర్వే ధన అధ్యక్షా ధనం ఆదాయ పుష్కలం |
వ్రజంతి అగ్రే సు విహితా నానా రత్న సమన్వితాః |౧-౬౯-౨|
చతురంగ బలం చ అపి శీఘ్రం నిర్యాతు సర్వశః |
మమ ఆజ్ఞా సమకాలం చ యానం యుగ్మం అనుత్తమం |౧-౬౯-౩|
వసిష్ఠో వామదేవః చ జాబాలిః అథ కాశ్యపః |
మార్కణ్డేయః చ దీర్ఘాయుః ఋషిః కాత్యాయనః తథా |౧-౬౯-౪|
ఏతే ద్విజాః ప్రయాంతు అగ్రే స్యందనం యోజయస్వ మే |
యథా కాల అత్యయో న స్యాత్ దూతా హి త్వరయంతి మాం |౧-౬౯-౫|
వచనాత్ చ నరేంద్రస్య సేనా చ చతురంగిణీ |
రాజానం ఋషిభిః సార్ధం వ్రజంతం పృష్ఠతో అన్వగాత్ |౧-౬౯-౬|
గత్వా చతుర్ అహం మార్గం విదేహాన్ అభ్యుపేయివాన్ |
రాజా తు జనకః శ్రీమాన్ శ్రుత్వా పూజాం అకల్పయత్ |౧-౬౯-౭|
తతో రాజానం ఆసాద్య వృద్ధం దశరథం నృపం |
జనకో ముదితో రాజా హర్షం చ పరమం యయౌ |౧-౬౯-౮|
ఉవాచ వచనం శ్రేష్ఠో నరశ్రేష్ఠం ముదా అన్వితం |
స్వాగతం తే నరశ్రేష్ఠః దిష్ట్యా ప్రాప్తో అసి రాఘవ |౧-౬౯-౯|
పుత్రయోః ఉభయోః ప్రీతిం లప్స్యసే వీర్య నిర్జితాం |
దిష్ట్యా ప్రాప్తో మహాతేజా వసిష్ఠో భగవాన్ ఋషిః |౧-౬౯-౧౦|
సహ సర్వైః ద్విజ శ్రేష్ఠైః దేవైః ఇవ శతక్రతుః |
దిష్ట్యా మే నిర్జితా విఘ్నా దిష్ట్యా మే పూజితం కులం |౧-౬౯-౧౧|
రాఘవైః సహ సంబంధాత్ వీర్య శ్రేష్ఠైః మహాత్మభిః |
శ్వః ప్రభాతే నరేంద్ర త్వం సంవర్తయితుం అర్హసి |౧-౬౯-౧౨|
యజ్ఞస్య అంతే నరశ్రేష్ఠ వివాహం ఋషి సత్తమైః |
తస్య తత్ వచనం శ్రుత్వా ఋషి మధ్యే నరాధిపః |౧-౬౯-౧౩|
వాక్యం వాక్యవిదాం శ్రేష్ఠః ప్రత్యువాచ మహీపతిం |
ప్రతిగ్రహో దాతృ వశః శ్రుతం ఏతత్ మయా పురా |౧-౬౯-౧౪|
యథా వక్ష్యసి ధర్మజ్ఞ తత్ కరిష్యామహే వయం |
తత్ ధర్మిష్ఠం యశస్యం చ వచనం సత్య వాదినః |౧-౬౯-౧౫|
శ్రుత్వా విదేహ అధిపతిః పరం విస్మయం ఆగతః |
తతః సర్వే ముని గణాః పరస్పర సమాగమే |౧-౬౯-౧౬|
హర్షేణ మహతా యుక్తాః తాం నిశాం అవసన్ సుఖం |
అథ రామో మహాతేజా లక్ష్మణేన సమం యయౌ |౧-౬౯-౧౭|
విశ్వామిత్రం పురస్కృత్య పితుః పాదౌ ఉపస్పృశన్ |
రాజా చ రాఘవౌ పుత్రౌ నిశామ్య పరిహర్షితః |౧-౬౯-౧౮|
ఉవాస పరమ ప్రీతో జనకేన సుపూజితః |
జనకో అపి మహాతేజాః క్రియా ధర్మేణ తత్త్వవిత్ |
యజ్ఞస్య చ సుతాభ్యాం చ కృత్వా రాత్రిం ఉవాస హ |౧-౬౯-౧౯|

ఇతి వాల్మీకి రామాయణే ఆది కావ్యే బాలకాండే ఏకోనసప్తతితమః సర్గః |౧-౬౯|



శ్రీమద్వాల్మీకియరామాయణే బాలకాండే సప్తతితమః సర్గః |౧-౭౦|
తతః ప్రభాతే జనకః కృత కర్మా మహర్షిభిః |
ఉవాచ వాక్యం వాక్యజ్ఞః శతానందం పురోహితం |౧-౭౦-౧|
భ్రాతా మమ మహాతేజా యవీయాన్ అతిధార్మికః |
కుశధ్వజ ఇతి ఖ్యాతః పురీం అధ్యవసత్ శుభాం |౧-౭౦-౨|
వార్యా ఫలక పర్యంతాం పిబన్ ఇక్షుమతీం నదీం |
సాంకాశ్యాం పుణ్య సంకాశాం విమానం ఇవ పుష్పకం |౧-౭౦-౩|
తం అహం ద్రష్టుం ఇచ్ఛామి యజ్ఞ గోప్తా స మే మతః |
ప్రీతిం సో అపి మహాతేజా ఇమాం భోక్తా మయా సహ |౧-౭౦-౪|
ఏవం ఉక్తో తు వచనే శతానందస్య సంనిధౌ |
ఆగతాః కేచిద్ అవ్యగ్రా జనకః తాన్ సమాదిశత్ |౧-౭౦-౫|
శాసనాత్ తు నరేంద్రస్య ప్రయయుః శీఘ్ర వాజిభిః |
సమానేతుం నరవ్యాఘ్రం విష్ణుం ఇంద్ర ఆజ్ఞయా యథా |౧-౭౦-౬|
సంకాస్యాం తే సమాగమ్య దదృశుః చ కుశ్ధ్వజం |
న్యవేదయన్ యథా వృత్తం జనకస్య చ చింతితం |౧-౭౦-౭|
తద్ వృత్తం నృపతిః శ్రుత్వా దూత శ్రేష్ఠైః మహా జవైః |
ఆజ్ఞయా తు నరేంద్రస్య ఆజగామ కుశధ్వజః |౧-౭౦-౮|
స దదర్శ మహాత్మానం జనకం ధర్మ వత్సలం |
సో అభివాద్య శతానందం జనకం చ అతి ధార్మికం |౧-౭౦-౯|
రాజ అర్హం పరమం దివ్యం ఆసనం చ అధ్యరోహత |
ఉపవిష్టౌ ఉభౌ తౌ తు భ్రాతరౌ అమిత ఓజసౌ |౧-౭౦-౧౦|
ప్రేషయామాసతుః వీరౌ మంత్రి శ్రేష్ఠం సుదామనం |
గచ్ఛ మంత్రి పతే శీఘ్రం ఇక్ష్వాకం అమిత ప్రభం |౧-౭౦-౧౧|
ఆత్మజైః సహ దుర్ధర్షం ఆనయస్వ స మంత్రిణం |
ఔపకార్యాం స గత్వా తు రఘూణాం కుల వర్ధనం |౧-౭౦-౧౨|
దదర్శ శిరసా చ ఏనం అభివాద్య ఇదం అబ్రవీత్ |
అయోధ్యా అధిపతే వీర వైదేహో మిథిలా అధిపః |౧-౭౦-౧౩|
స త్వాం ద్రష్టుం వ్యవసితః స ఉపాధ్యాయ పురోహితం |
మంత్రి శ్రేష్ఠ వచః శ్రుత్వా రాజా స ఋషి గణః తదా |౧-౭౦-౧౪|
స బంధుః అగమత్ తత్ర జనకో యత్ర వర్తతే |
రాజా చ మంత్రి సహితః స ఉపాధ్యాయః స బాంధవః |౧-౭౦-౧౫|
వాక్యం వాక్య విదాం శ్రేష్ఠో వైదేహం ఇదం అబ్రవీత్ |
విదితం తే మహారాజ ఇక్ష్వాకు కుల దైవతం |౧-౭౦-౧౬|
వక్తా సర్వేషు కృత్యేషు వసిష్ఠో భగవాన్ ఋషిః |
విశ్వామిత్ర అభ్యనుజ్ఞాతః సహ సర్వైః మహర్షిభిః |౧-౭౦-౧౭|
ఏష వక్ష్యతి ధర్మాత్మా వసిష్ఠో మే యథా క్రమం |
తూష్ణీం భూతే దశరథే వసిష్ఠో భగవాన్ ఋషిః |౧-౭౦-౧౮|
ఉవాచ వాక్యం వాక్యజ్ఞో వైదేహం స పురోధసాం |
అవ్యక్త ప్రభవో బ్రహ్మా శాశ్వతో నిత్య అవ్యయః |౧-౭౦-౧౯|
తస్మాత్ మరీచిః సంజజ్ఞే మరీచేః కశ్యపః సుతః |
వివస్వాన్ కశ్యపాత్ జజ్ఞే మనుర్ వైవస్వతః స్మృతః |౧-౭౦-౨౦|
మనుః ప్రజాపతిః పూర్వం ఇక్ష్వాకుః చ మనోః సుతః |
తం ఇక్ష్వాకుం అయోధ్యాయాం రాజానం విద్ధి పూర్వకం |౧-౭౦-౨౧|
ఇక్ష్వాకోః తు సుతః శ్రీమాన్ కుక్షిః ఇతి ఏవ విశ్రుతః |
కుక్షేః అథ ఆత్మజః శ్రీమాన్ వికుక్షిః ఉపపద్యత |౧-౭౦-౨౨|
వికుక్షేః తు మహాతేజా బాణః పుత్రః ప్రతాపవాన్ |
బాణస్య తు మహాతేజా అనరణ్యః ప్రతాపవాన్ |౧-౭౦-౨౩|
అనరణ్యాత్ పృథుః జజ్ఞే త్రిశంకుః తు పృథోః సుతః |
త్రిశంకోః అభవత్ పుత్రో ధుంధుమారః మహాయశాః |౧-౭౦-౨౪|
ధుంధుమారాత్ మహాతేజా యువనాశ్వో మహారథః |
యువనాశ్వ సుతః అసీత్ మాంధాతా పృథివీ పతిః |౧-౭౦-౨౫|
మాంధాతుః తు సుతః శ్రీమాన్ సుసంధిః ఉదపద్యత |
సుసంధేః అపి పుత్రౌ ద్వౌ ధ్రువసంధిః ప్రసేనజిత్ |౧-౭౦-౨౬|
యశస్వీ ధ్రువసంధేః తు భరతో నామ నామతః |
భరతాత్ తు మహాతేజా అసితో నామ జాయత |౧-౭౦-౨౭|
యస్య ఏతే ప్రతి రాజన ఉదపత్యంత శాత్రవః |
హైహయ తాలజంఘాః చ శూరాః చ శశబింద్వః |౧-౭౦-౨౮|
తాన్ చ స ప్రతి యుద్ధ్యన్ వై యుద్ధే రాజా ప్రవాసితః |
హిమవంతం ఉపాగమ్య భార్యాభ్యాం సహితః తదా |౧-౭౦-౨౯|
అసితో అల్ప బలో రాజా కాల ధర్మం ఉపేయివాన్ |
ద్వే చ అస్య భార్యే గర్భిణ్యై బభూవతుః ఇతి శ్రుతి |౧-౭౦-౩౦|
ఏకా గర్భ వినాశ అర్థం సపత్నై సగరం దదౌ |
తతః శైలవరే రమ్యే బభూవ అభిరతో మునిః |౧-౭౦-౩౧|
భార్గవ చ్యవనో నామ హిమవంతం ఉపాశ్రితః |
తత్ర చ ఏకా మహాభాగా భార్గవం దేవ వర్చసం |౧-౭౦-౩౨|
వవందే పద్మ పత్రాక్షీ కాంక్షంతీ సుతం ఉత్తమం |
తం ఋషిం సా అభ్యుపగమ్య కాలిందీ చ అభ్యవాదత |౧-౭౦-౩౩|
స తాం అభ్యవదత్ విప్రః పుత్ర ఈప్సుం పుత్ర జన్మని |
తవ కుక్షౌ మహాభాగే సు పుత్రః సు మహాబలః |౧-౭౦-౩౪|
మహావీర్యో మహాతేజా అచిరాత్ సంజనిష్యతి |
గరేణ సహితః శ్రీమాన్ మా శుచః కమలేక్షణే |౧-౭౦-౩౫|
చ్యవనం చ నమస్కృత్య రాజపుత్రీ పతివ్రతా |
పత్యా విరహితా తస్మాత్ పుత్రం దేవీ వ్యజాయత |౧-౭౦-౩౬|
సపత్న్యా తు గరః తస్యైః దత్తో గర్భ జిఘాంసయా |
సహ తేన గరేణ ఏవ సంజాతః సగరోఇ అభవత్ |౧-౭౦-౩౭|
సగరస్య అస్య అసమంజః తు అసమంజాత్ అథ అంశుమాన్ |
దిలీపో అంశుమతః పుత్రో దిలీపస్య భగీరథః |౧-౭౦-౩౮|
భగీరథాత్ కకుత్స్థః చ కకుత్స్థస్య రఘుః తథా |
రఘోః తు పుత్రః తేజస్వీ ప్రవృద్ధః పురుషాదకః |౧-౭౦-౩౯|
కల్మాషపాదో హి అభవత్ తస్మాత్ జాతః తు శఙ్ఖణః |
సుదర్శనః శంఖణస్య అగ్నివర్ణః సుదర్శనాత్ |౧-౭౦-౪౦|
శీఘ్రగః తు అగ్నివర్ణస్య శీఘ్రగస్య మరుః సుతః |
మరోః ప్రశుశ్రుకః తు ఆసీత్ అంబరీషః ప్రశుశ్రుకాత్ |౧-౭౦-౪౧|
అంబరీషస్య పుత్రో అభూత్ నహుషః చ మహీపతిః |
నహుషస్య యయాతిః తు నాభాగః తు యయాతి జః |౧-౭౦-౪౨|
నాభాగస్య భభూవ అజ అజాత్ దశరథో అభవత్ |
అస్మాత్ దశరథాత్ జాతౌ భ్రాతరౌ రామ లక్ష్మణౌ |౧-౭౦-౪౩|
ఆది వంశ విశుద్ధానాం రాజ్ఞాం పరమ ధర్మిణాం |
ఇక్ష్వాకు కుల జాతానాం వీరాణాం సత్య వాదినాం |౧-౭౦-౪౪|
రామ లక్ష్మణయోః అర్థే త్వత్ సుతే వరయే నృప |
సదృశాభ్యాం నరశ్రేష్ఠ సదృశే దాతుం అర్హసి |౧-౭౦-౪౫|

ఇతి వాల్మీకి రామాయణే ఆది కావ్యే బాలకాండే సప్తతితమః సర్గః |౧-౭౦|


శ్రీమద్వాల్మీకియరామాయణే బాలకాండే ఏకసప్తతితమః సర్గః |౧-౭౧|
ఏవం బ్రువాణం జనకః ప్రత్యువాచ కృతాంజలిః |
శ్రోతుం అర్హసి భద్రం తే కులం నః పరికీర్తితం |౧-౭౧-౧|
ప్రదానే హి ముని శ్రేష్ఠ కులం నిరవశేషతః |
వక్తవ్యం కుల జాతేన తన్ నిబోధ మహామునే |౧-౭౧-౨|
రాజా అభూత్ త్రిషు లోకేషు విశ్రుతః స్వేన కర్మణా |
నిమిః పరమ ధర్మాత్మా సర్వ సత్త్వవతాం వరః |౧-౭౧-౩|
తస్య పుత్రో మిథిః నామ జనకో మిథి పుత్రకః |
ప్రథమో జనకో నామ జనకాత్ అపి ఉదావసుః |౧-౭౧-౪|
ఉదావసోః తు ధర్మాత్మా జాతో వై నందివర్ధనః |
నందివర్ధన పుత్రః తు సుకేతుః నామ నామతః |౧-౭౧-౫|
సుకేతోః అపి ధర్మాత్మా దేవరాతో మహాబలః |
దేవరాతస్య రాజర్షేః బృహద్రథ ఇతి స్మౄతః |౧-౭౧-౬|
బృహద్రథస్య శూరో అభూత్ మహావీరః ప్రతాపవాన్ |
మహావీరస్య ధృతిమాన్ సుధృతిః సత్య విక్రమః |౧-౭౧-౭|
సుధృతేః అపి ధర్మాత్మా ధృష్టకేతుః సు ధార్మికః |
ధృష్టకేతోః చ రాజర్షేః హర్యశ్వ ఇతి విశ్రుతః |౧-౭౧-౮|
హర్యశ్వస్య మరుః పుత్రో మరోః పుత్రః ప్రతీంధకః |
ప్రతీంధకస్య ధర్మాత్మా రాజా కీర్తిరథః సుతః |౧-౭౧-౯|
పుత్రః కీర్తిరథస్య అపి దేవమీఢ ఇతి స్మృతః |
దేవమీఢస్య విబుధో విబుధస్య మహీధ్రకః |౧-౭౧-౧౦|
మహీధ్రక సుతో రాజా కీర్తిరాతో మహాబలః |
కీర్తి రాతస్య రాజఋషేః మహారోమా వ్యజాయత |౧-౭౧-౧౧|
మహారోమ్ణః తు ధర్మాత్మా స్వర్ణరోమా వ్యజాయత |
స్వర్ణరోమ్ణః తు రాజర్షేః హ్రస్వరోమా వ్యజాయత |౧-౭౧-౧౨|
తస్య పుత్ర ద్వయం జజ్ఞే ధర్మజ్ఞస్య మహాత్మనః |
జ్యేష్ఠో అహం అనుజో భ్రాతా మమ వీరః కుశధ్వజ |౧-౭౧-౧౩|
మాం తు జ్యేష్ఠం పితా రాజ్యే సో అభిషిచ్య నరాధిప |
కుశధ్వజం సమావేశ్య భారం మయి వనం గతః |౧-౭౧-౧౪|
వృద్ధే పితరి స్వర్ యాతే ధర్మేణ ధురం ఆవహం |
భ్రాతరం దేవ సంకాశం స్నేహాత్ పశ్యన్ కుశధ్వజం |౧-౭౧-౧౫|
కస్యచిత్ తు అథ కాలస్య సాంకాశ్యాత్ అగమత్ పురాత్ |
సుధన్వా వీర్యవాన్ రాజా మిథిలాం అవరోధకః |౧-౭౧-౧౬|
స చ మే ప్రేషయామాస శైవం ధనుః అనుత్తమం |
సీతా కన్యా చ పద్మాక్షీ మహ్యం వై దీయతాం ఇతి |౧-౭౧-౧౭|
తస్య అప్రదానాత్ బ్రహ్మర్షే యుద్ధం ఆసీత్ మయా సహ |
స హతో అభిముఖో రాజా సుధన్వా తు మయా రణే |౧-౭౧-౧౮|
నిహత్య తం మునిశ్రేష్ఠ సుధన్వానం నరాధిపం |
సాంకాశ్యే భ్రాతరం శూరం అభ్యషించం కుశధ్వజం |౧-౭౧-౧౯|
కనీయాన్ ఏష మే భ్రాతా అహం జ్యేష్ఠో మహామునే |
దదామి పరమ ప్రీతో వధ్వౌ తే మునిపుంగవ |౧-౭౧-౨౦|
సీతాం రామాయ భద్రం తే ఊర్మిలాం లక్ష్మణాయ వై |
వీర్య శుల్కాం మమ సుతాం సీతాం సుర సుత ఉపమాం |౧-౭౧-౨౧|
ద్వితీయాం ఊర్మిలాం చైవ త్రిః వదామి న సంశయః |
దదామి పరమ ప్రీతో వధ్వౌ తే మునిపుంగవ |౧-౭౧-౨౨|
రామ లక్ష్మణయో రాజన్ గో దానం కారయస్వ హ |
పితృ కార్యం చ భద్రం తే తతో వైవాహికం కురు |౧-౭౧-౨౩|
మఘా హి అద్య మహాబాహో తృతీయే దివసే ప్రభో |
ఫల్గున్యాం ఉత్తరే రాజన్ తస్మిన్ వైవాహికం కురు |
రామ లక్ష్మణయోః అర్థే దానం కార్యం సుఖోదయం |౧-౭౧-౨౪|

ఇతి వాల్మీకి రామాయణే ఆది కావ్యే బాలకాండే ఏకసప్తతితమః సర్గః |౧-౭౧|



శ్రీమద్వాల్మీకియరామాయణే బాలకాండే ద్విసప్తతితమః సర్గః |౧-౭౨|
తం ఉక్తవంతం వైదేహం విశ్వామిత్రో మహామునిః |
ఉవాచ వచనం వీరం వసిష్ఠ సహితో నృపం |౧-౭౨-౧|
అచింత్యాని అప్రమేయాణి కులాని నరపుంగవ |
ఇక్ష్వాకూణాం విదేహానాం న ఏషాం తుల్యో అస్తి కశ్చన |౧-౭౨-౨|
సదృశో ధర్మ సంబంధః సదృశో రూప సంపదా |
రామ లక్ష్మణయో రాజన్ సీతా చ ఊర్మిలయా సహ |౧-౭౨-౩|
వక్తవ్యం చ నర శ్రేష్ఠ శ్రూయతాం వచనం మమ |
భ్రాతా యవీయాన్ ధర్మజ్ఞ ఏష రాజా కుశధ్వజః |౧-౭౨-౪|
అస్య ధర్మాత్మనో రాజన్ రూపేణ అప్రతిమం భువి |
సుతా ద్వయం నరశ్రేష్ఠ పత్ని అర్థం వరయామహే |౧-౭౨-౫|
భరతస్య కుమారస్య శత్రుఘ్నస్య చ ధీమతః |
వరయేమ సుతే రాజన్ తయోః అర్థే మహాత్మనోః |౧-౭౨-౬|
పుత్రా దశరథస్య ఇమే రూప యౌవన శాలినః |
లోక పాల సమాః సర్వే దేవ తుల్య పరాక్రమాః |౧-౭౨-౭|
ఉభయోః అపి రాజేంద్ర సంబంధేన అనుబధ్యతాం |
ఇక్ష్వాకు కులం అవ్యగ్రం భవతః పుణ్య కర్మణః |౧-౭౨-౮|
విశ్వామిత్ర వచః శ్రుత్వా వసిష్ఠస్య మతే తదా |
జనకః ప్రాంజలిః వాక్యం ఉవాచ మునిపుంగవౌ |౧-౭౨-౯|
కులం ధన్యం ఇదం మన్యే యేషాం తౌ మునిపుంగవౌ |
సదృశం కుల సంబంధం యత్ ఆజ్ఞాపయథః స్వయం |౧-౭౨-౧౦|
ఏవం భవతు భద్రం వః కుశధ్వజ సుతే ఇమే |
పత్న్యౌ భజేతాం సహితౌ శత్రుఘ్న భరతౌ ఉభౌ |౧-౭౨-౧౧|
ఏక అహ్నా రాజ పుత్రీణాం చతసౄణాం మహామునే |
పాణీన్ గృహ్ణంతు చత్వారో రాజ పుత్రా మహాబలాః |౧-౭౨-౧౨|
ఉత్తరే దివసే బ్రహ్మన్ ఫల్గునీభ్యాం మనీషిణః |
వైవాహికం ప్రశంసంతి భగో యత్ర ప్రజాపతిః |౧-౭౨-౧౩|
ఏవం ఉక్త్వా వచః సౌమ్యం ప్రత్యుత్థాయ కృతాంజలిః |
ఉభౌ ముని వరౌ రాజా జనకో వాక్యం అబ్రవీత్ |౧-౭౨-౧౪|
పరో ధర్మః కృతో మహ్యం శిష్యో అస్మి భవతోః సదా |
ఇమాని ఆసన ముఖ్యాని ఆస్యతాం మునిపుంగవౌ |౧-౭౨-౧౫|

యథా దశరథస్య ఇయం తథా అయోధ్యా పురీ మమ |
ప్రభుత్వే న అస్తి సందేహో యథా అర్హం కర్తుం అర్హథః |౧-౭౨-౧౬|
తథా బ్రువతి వైదేహే జనకే రఘు నందనః |
రాజా దశరథో హృష్టః ప్రత్యువాచ మహీ పతిం |౧-౭౨-౧౭|
యువాం అసంఖ్యేయ గుణౌ భ్రాతరౌ మిథిలేశ్వరౌ |
ఋషయో రాజ సంఘాః చ భవద్భ్యాం అభిపూజితాః |౧-౭౨-౧౮|
స్వస్తి ప్రాప్నుహి భద్రం తే గమిష్యామః స్వం ఆలయం |
శ్రాద్ధ కర్మాణి విధివత్ విధాస్య ఇతి చ అబ్రవీత్ |౧-౭౨-౧౯|
తం ఆపృష్ట్వా నర పతిం రాజా దశరథః తదా |
మునీంద్రౌ తౌ పురస్కృత్య జగామ ఆశు మహాయశాః |౧-౭౨-౨౦|
స గత్వా నిలయం రాజా శ్రాద్ధం కృత్వా విధానతః |
ప్రభాతే కాల్యం ఉత్థాయ చక్రే గో దానం ఉత్తమం |౧-౭౨-౨౧|
గవాం శత సహస్రం చ బ్రాహ్మణేభ్యో నరాధిపః |
ఏక ఏకశో దదౌ రాజా పుత్రాన్ ఉద్ధిశ్య ధర్మతః |౧-౭౨-౨౨|
సువర్ణ శృంగయః సంపన్నాః స వత్సాః కాంస్య దోహనాః |
గవాం శత సహస్రాణి చత్వారి పురుష ఋషభః |౧-౭౨-౨౩|
విత్తం అన్యత్ చ సు బహు ద్విజేభ్యో రఘు నందనః |
దదౌ గో దానం ఉద్దిశ్య పుత్రాణాం పుత్ర వత్సలః |౧-౭౨-౨౪|
స సుతైః కృత గో దానైః వృతః సః నృపతిః తదా |
లోక పాలైః ఇవ ఆభాతి వృతః సౌమ్యః ప్రజాపతిః |౧-౭౨-౨౫|

ఇతి వాల్మీకి రామాయణే ఆది కావ్యే బాలకాండే ద్విసప్తతితమః సర్గః |౧-౭౨|

Om Tat Sat

(Continued ....)

(My humble salutations to the lotus feet of  Swamy jis, Philosophic Scholars and greatful to Wikisource  for the collection)