Valmiki Ramayanam - Balakanda - Part 10

శ్రీమద్వాల్మీకియరామాయణే బాలకాండే అష్టాదశః సర్గః |౧-౧౮|
నిర్వృత్తే తు క్రతౌ తస్మిన్ హయమేధే మహాత్మనః |
ప్రతి గృహ్య అమరా భాగాన్ ప్రతిజగ్ముః యథా ఆగతం |౧-౧౮-౧|
సమాప్త దీక్షా నియమః పత్నీ గణ సమన్వితః |
ప్రవివేశ పురీం రాజా స భృత్య బల వాహనః |౧-౧౮-౨|
యథా అర్హం పూజితాః తేన రాజ్ఞా చ పృథివీశ్వరాః |
ముదితాః ప్రయయుః దేశాన్ ప్రణమ్య ముని పుంగవం |౧-౧౮-౩|
శ్రీమతాం గచ్ఛతాం తేషాం స్వగృహాణి పురాత్ తతః |
బలాని రాజ్ఞాం శుభ్రాణి ప్రహృష్టాని చకాశిరే |౧-౧౮-౪|
గతేషు పృథివీశేషు రాజా దశరథః పునః |
ప్రవివేశ పురీం శ్రీమాన్ పురస్కృత్య ద్విజోత్తమాన్ |౧-౧౮-౫|
శాంతయా ప్రయయౌ సార్ధం ఋష్యశృఙ్గః సుపూజితః |
అనుగమ్యమానో రాజ్ఞా చ సానుయాత్రేణ ధీమతా |౧-౧౮-౬|
ఏవం విసృజ్య తాన్ సర్వాన్ రాజా సంపూర్ణ మానసః |
ఉవాస సుఖితః తత్ర పుత్ర ఉత్పత్తిం విచింతయన్ |౧-౧౮-౭|
తతో యజ్ఞే సమాప్తే తు ఋతూనాం షట్ సమత్యయుః |
తతః చ ద్వాదశే మాసే చైత్రే నావమికే తిథౌ |౧-౧౮-౮|
నక్క్షత్రే అదితి దైవత్యే స్వ ఉచ్ఛ సంస్థేషు పంచసు |
గ్రహేషు కర్కటే లగ్నే వాక్పతా ఇందునా సహ |౧-౧౮-౯|
ప్రోద్యమానే జగన్నాథం సర్వ లోక నమస్కృతం |
కౌసల్యా అజనయత్ రామం సర్వ లక్షణ సంయుతం |౧-౧౮-౧౦|
విష్ణోః అర్ధం మహాభాగం పుత్రం ఐక్ష్వాకు నందనం |
లోహితాక్షం మహాబాహుం రక్త ఓష్టం దుందుభి స్వనం |౧-౧౮-౧౧|
కౌసల్యా శుశుభే తేన పుత్రేణ అమిత తేజసా |
యథా వరేణ దేవానాం అదితిః వజ్ర పాణినా |౧-౧౮-౧౨|
భరతో నామ కైకేయ్యాం జజ్ఞే సత్య పరాక్రమః |
సాక్షాత్ విష్ణోః చతుర్థ భాగః సర్వైః సముదితో గుణైః |౧-౧౮-౧౩|
అథ లక్ష్మణ శత్రుఘ్నౌ సుమిత్రా అజనయత్ సుతౌ |
వీరౌ సర్వ అస్త్ర కుశలౌ విష్ణోః అర్ధ సమన్వితౌ |౧-౧౮-౧౪|
పుష్యే జాతః తు భరతో మీన లగ్నే ప్రసన్న ధీః |
సార్పే జాతౌ తు సౌమిత్రీ కుళీరే అభ్యుదితే రవౌ |౧-౧౮-౧౫|
రాజ్ఞః పుత్రా మహాత్మానః చత్వారో జజ్ఞిరే పృథక్ |
గుణవంతః అనురూపాః చ రుచ్యా ప్రోష్ఠ పదోపమాః |౧-౧౮-౧౬|
జగుః కలం చ గంధర్వా ననృతుః చ అప్సరో గణాః |
దేవ దుందుభయో నేదుః పుష్ప వృష్టిః చ ఖాత్ పతత్ |౧-౧౮-౧౭| ఉత్సవః చ మహాన్ ఆసీత్ అయోధ్యాయాం జనాకులః |
రథ్యాః చ జన సంబాధా నట నర్తక సంకులాః |౧-౧౮-౧౮|
గాయనైః చ విరావిణ్యో వాదనైః చ తథ అపరైః |
విరేజుర్ విపులాః తత్ర సర్వ రత్న సమన్వితాః |౧-౧౮-౧౯|
ప్రదేయాంశ్చ దదౌ రాజా సూత మాగధ వందినాం |
బ్రాహ్మణేభ్యో దదౌ విత్తం గో ధనాని సహస్రశః |౧-౧౮-౨౦|
అతీత్య ఏకాదశ ఆహం తు నామ కర్మ తథా అకరోత్ |
జ్యేష్ఠం రామం మహాత్మానం భరతం కైకయీ సుతం |౧-౧౮-౨౧|
సౌమిత్రిం లక్ష్మణం ఇతి శత్రుఘ్నం అపరం తథా |
వసిష్ఠః పరమ ప్రీతో నామాని కురుతే తదా |౧-౧౮-౨౨|
బ్రాహ్మణాన్ భోజయామాస పౌరాన్ జానపదాన్ అపి |
ఉదదద్ బ్రాహ్మణానాం చ రత్నౌఘం అమలం బహు |౧-౧౮-౨౩|
తేషాం జన్మ క్రియ ఆదీని సర్వ కర్మాణి అకారయత్ |
తేషాం కేతుః ఇవ జ్యేష్ఠో రామో రతికరః పితుః |౧-౧౮-౨౪|
బభూవ భూయో భూతానాం స్వయం భూః ఇవ సమ్మతః |
సర్వే వేద విదః శూరాః సర్వే లోకహితే రతాః |౧-౧౮-౨౫|
సర్వే జ్ఞానోపసంపన్నాః సర్వే సముదితా గుణైః |
తేషాం అపి మహాతేజా రామః సత్య పరాక్రమః |౧-౧౮-౨౬|
ఇష్టః సర్వస్య లోకస్య శశాంక ఇవ నిర్మలః |
గజ స్కంధే అశ్వ పృష్టే చ రథ చర్యాసు సమ్మతః |౧-౧౮-౨౭|
ధనుర్వేదే చ నిరతః పితుః శుశౄషణే రతః |
బాల్యాత్ ప్రభృతి సుస్నిగ్ధో లక్ష్మణో లక్ష్మి వర్ధనః |౧-౧౮-౨౮|
రామస్య లోకరామస్య భ్రాతుః జ్యేష్ఠస్య నిత్యశః |
సర్వ ప్రియ కరః తస్య రామస్య అపి శరీరతః |౧-౧౮-౨౯|
లక్ష్మణో లక్ష్మి సంపన్నో బహిః ప్రాణ ఇవ అపరః |
న చ తేన వినా నిద్రాం లభతే పురుషోత్తమః |౧-౧౮-౩౦|
మృష్టం అన్నం ఉపానీతం అశ్నాతి న హి తం వినా |
యదా హి హయం ఆరూఢో మృగయాం యాతి రాఘవః |౧-౧౮-౩౧|
అథ ఏనం పృష్ఠతః అభ్యేతి స ధనుః పరిపాలయన్ |
భరతస్య అపి శత్రుఘ్నో లక్ష్మణ అవరజో హి సః |౧-౧౮-౩౨|
ప్రాణైః ప్రియతరో నిత్యం తస్య చ ఆసీత్ తథా ప్రియః |
స చతుర్భిః మహాభాగైః పుత్రైః దశరథః ప్రియైః |౧-౧౮-౩౩|
బభూవ పరమ ప్రీతో దేవైః ఇవ పితామహః |
తే యదా జ్ఞాన సంపన్నాః సర్వైః సముదితా గుణైః |౧-౧౮-౩౪|
హ్రీమంతః కీర్తిమంతః చ సర్వజ్ఞా దీర్ఘ దర్శినః |
తేషాం ఏవం ప్రభావాణాం సర్వేషాం దీప్త తేజసాం |౧-౧౮-౩౫|
పితా దశరథో హృష్టో బ్రహ్మా లోకాధిపో యథా |
తే చ అపి మనుజ వ్యాఘ్రా వైదిక అధ్యయనే రతాః |౧-౧౮-౩౬|
పితృ శుశ్రూషణ రతా ధనుర్ వేదే చ నిష్టితాః |
అథ రాజా దశరథః తేషాం దార క్రియాం ప్రతి |౧-౧౮-౩౭|
చింతయామాస ధర్మాత్మా సహ ఉపాధ్యాయః స బాంధవః |
తస్య చింతయమానస్య మంత్రి మధ్యే మహాత్మనః |౧-౧౮-౩౮|
అభ్యాగచ్ఛత్ మహాతేజా విశ్వామిత్రో మహామునిః |
స రాజ్ఞో దర్శన ఆకాంక్షీ ద్వార అధ్యక్షాన్ ఉవాచ హ |౧-౧౮-౩౯|
శీఘ్రం ఆఖ్యాత మాం ప్రాప్తం కౌశికం గాధినః సుతం |
తత్ శ్రుత్వా వచనం తస్య రాజ్ఞో వేశ్మ ప్రదుద్రువుః |౧-౧౮-౪౦|
సంభ్రాంత మనసః సర్వే తేన వాక్యేన చోదితాః |
తే గత్వా రాజ భవనం విశ్వామిత్రం ఋషిం తదా |౧-౧౮-౪౧|
ప్రాప్తం ఆవేదయామాసుః నృపాయైః ఇక్ష్వాకవే తదా |
తేషాం తత్ వచనం శ్రుత్వా సపురోధాః సమాహితః |౧-౧౮-౪౨|
ప్రతి ఉజ్జగామ సంహృష్టో బ్రహ్మాణం ఇవ వాసవః |
తం దృష్ట్వా జ్వలితం దీప్త్యా తపసం సంశిత వ్రతం |౧-౧౮-౪౩|
ప్రహృష్ట వదనో రాజా తతః అర్ఘ్యం ఉపహారయత్ |
స రాజ్ఞః ప్రతిగృహ్య అర్ఘ్యం శాస్త్ర దృష్టేన కర్మణా |౧-౧౮-౪౪|
కుశలం చ అవ్యయం చ ఏవ పర్య పృచ్ఛత్ నరాధిపం |
పురే కోశే జనపదే బాంధవేషు సుహృత్సు చ |౧-౧౮-౪౫|
కుశలం కౌశికో రాజ్ఞః పర్యపృచ్ఛత్ సుధార్మికః |
అపి తే సంనతాః సర్వే సామంత రిపవో జితాః |౧-౧౮-౪౬|
దైవం చ మానుషం చ ఏవ కర్మ తే సాధు అనుష్టితం |
వసిష్ఠం చ సమాగమ్య కుశలం మునిపుంగవః |౧-౧౮-౪౭|
ఋషీం చ తాన్ యథా న్యాయం మహాభాగ ఉవాచ హ |
తే సర్వే హృష్ట మనసః తస్య రాజ్ఞో నివేశనం |౧-౧౮-౪౮|
వివిశుః పూజితాః తేన నిషేదుః చ యథా అర్హతః |
అథ హృష్ట మనా రాజా విశ్వామిత్రం మహామునిం |౧-౧౮-౪౯|
ఉవాచ పరమ ఉదారో హృష్టః తం అభిపూజయన్ |
యథా అమృతస్య సంప్రాప్తిః యథా వర్షం అనూదకే |౧-౧౮-౫౦|
యథా సదృశ దారేషు పుత్ర జన్మ అప్రజస్య వై |
ప్రణష్టస్య యథా లాభో యథా హర్షో మహోదయే |౧-౧౮-౫౧|
తథా ఏవ ఆగమనం మన్యే స్వాగతం తే మహామునే |
కం చ తే పరమం కామం కరోమి కిము హర్షితః |౧-౧౮-౫౨|
పాత్ర భూతోఽసి మే బ్రహ్మన్ దిష్ట్యా ప్రాప్తోఽసి మానద |
అద్య మే సఫలం జన్మ జీవితం చ సు జీవితం |౧-౧౮-౫౩|
యస్మాద్ విప్రేంద్రం అద్రాక్షం సుప్రభాతా నిశా మమ |
పూర్వం రాజర్షి శబ్దేన తపసా ద్యోతిత ప్రభః |౧-౧౮-౫౪|
బ్రహ్మర్షిత్వం అనుప్రాప్తః పూజ్యోఅసి బహుధా మయా |
తత్ అద్భుతం అభూత్ విప్ర పవిత్రం పరమం మమ |౧-౧౮-౫౫|
శుభ క్షేత్ర గతః చ అహం తవ సందర్శనాత్ ప్రభో |
బ్రూహి యత్ ప్రార్థితం తుభ్యం కార్యం ఆగమనం ప్రతి |౧-౧౮-౫౬|
ఇచ్ఛాం అనుగృహీతో అహం త్వదర్థం పరివృద్ధయే |
కార్యస్య న విమర్శం చ గంతుం అర్హసి సువ్రత |౧-౧౮-౫౭|
కర్తా చ అహం అశేషేణ దైవతం హి భవాన్ మమ |
మమ చ అయం అనుప్రాప్తో మహాన్ అభ్యుదయో ద్విజ |
తవ ఆగమన జః కృత్స్నో ధర్మః చ అనుత్తమో ద్విజ |౧-౧౮-౫౮|
ఇతి హృదయ సుఖం నిశమ్య వాక్యం
శ్రుతి సుఖం ఆత్మవతా వినీతం ఉక్తం |
ప్రథిత గుణ యశా గుణైః విశిష్టః
పరమ ఋషిః పరమం జగామ హర్షం |౧-౧౮-౫౯|

ఇతి వాల్మీకి రామాయణే ఆది కావ్యే బాలకాండే అష్టాదశః సర్గః |౧-౧౮|







శ్రీమద్వాల్మీకియరామాయణే బాలకాండే ఏకోనవింశః సర్గః |౧-౧౯|
తత్ శుర్త్వా రాజ సింహస్య వాక్యం అద్భుత విస్తరం |
హృష్ట రోమా మహాతేజా విశ్వామిత్రోఽభ్యభాషత |౧-౧౯-౧|
సదృశం రాజ శార్దూల తవ ఏవ భువి న అన్యతః |
మహావంశ ప్రసూతస్య వసిష్ఠ వ్యపదేశినః |౧-౧౯-౨|
యత్ తు మే హృద్ గతం వాక్యం తస్య కార్యస్య నిశ్చయం |
కురుష్వ రాజ శార్దూల భవ సత్య ప్రతిశ్రవః |౧-౧౯-౩|
అహం నియమం ఆతిష్ఠే సిధ్ద్యర్థం పురుషర్షభ |
తస్య విఘ్నకరౌ ద్వౌ తు రాక్షసౌ కామ రూపిణౌ |౧-౧౯-౪|
వ్రతే మే బహుశః చీర్ణే సమాప్త్యాం రాక్షసావిమౌ |
మారీచః చ సుబాహుః చ వీర్యవంతౌ సుశిక్షితౌ |౧-౧౯-౫|
తౌ మాంస రుధిర ఓఘేణ వేదిం తాం అభ్యవర్షతాం |
అవధూతే తథా భూతే తస్మిన్ నియమ నిశ్చయే |౧-౧౯-౬|
కృత శ్రమో నిరుత్సాహః తస్మాత్ దేశాత్ అపాక్రమే |
న చ మే క్రోధం ఉత్స్రష్టుం బుద్ధిః భవతి పార్థివ |౧-౧౯-౭|
తథా భూతా హి సా చర్యా న శాపః తత్ర ముచ్యతే |
స్వ పుత్రం రాజ శార్దూల రామం సత్య పరాక్రమం |౧-౧౯-౮|
కాక పక్ష ధరం శూరం జ్యేష్ఠం మే దాతుం అర్హసి |
శక్తో హి యేష మయా గుప్తో దివ్యేన స్వేన తేజసా |౧-౧౯-౯|
రాక్షసా యే వికర్తారః తేషాం అపి వినాశనే |
శ్రేయః చ అస్మై ప్రదాస్యామి బహురూపం న సంశయః |౧-౧౯-౧౦|
త్రయాణాం అపి లోకానాం యేన ఖ్యాతిం గమిష్యతి |
న చ తౌ రామం ఆసాద్య శక్తౌ స్థాతుం కథం చ న |౧-౧౯-౧౧|
న చ తౌ రాఘవాత్ అన్యో హంతుం ఉత్సహతే పుమాన్ |
వీర్య ఉత్సిక్తౌ హి తౌ పాపౌ కాల పాశ వశం గతౌ |౧-౧౯-౧౨|
రామస్య రాజ శార్దూల న పర్యాప్తౌ మహాత్మనః |
న చ పుత్ర గతం స్నేహం కర్తుం అర్హసి పార్థివ |౧-౧౯-౧౩|
అహం తే ప్రతి జానామి హతౌ తౌ విద్ధి రాక్షసౌ |
అహం వేద్మి మహాత్మానం రామం సత్య పరాక్రమం |౧-౧౯-౧౪|
వసిష్ఠోఽపి మహాతేజా యే చ ఇమే తపసి స్థితాః |
యది తే ధర్మ లాభం తు యశః చ పరమం భువి |౧-౧౯-౧౫|
స్థిరం ఇచ్ఛసి రాజేంద్ర రామం మే దాతుం అర్హసి |
యది అభ్యనుజ్ఞాం కాకుత్స్థ దదతే తవ మంత్రిణః |౧-౧౯-౧౬|
వసిష్ఠ ప్రముఖాః సర్వే తతో రామం విసర్జయ |
అభిప్రేతం అసంసక్తం ఆత్మజం దాతుం అర్హసి |౧-౧౯-౧౭|
దశ రాత్రం హి యజ్ఞస్య రామం రాజీవ లోచనం |
న అత్యేతి కాలో యజ్ఞస్య యథా అయం మమ రాఘవ |౧-౧౯-౧౮|
తథా కురుష్వ భద్రం తే మా చ శోకే మనః కృథాః |
ఇతి ఏవం ఉక్త్వా ధర్మాత్మా ధర్మార్థ సహితం వచః |౧-౧౯-౧౯|
విరరామ మహాతేజా విశ్వామిత్రో మహామతిః |
స తన్ నిశమ్య రాజేంద్రో విశ్వామిత్ర వచః శుభం |౧-౧౯-౨౦|
శోకేన మహతా ఆవిష్టః చచాల చ ముమోహ చ |
లబ్ధ సంజ్ఞః తతో ఉతథాయ వ్యషీదత భయాన్వితః |౧-౧౯-౨౧|
ఇతి హృదయ మనో విదారణం
ముని వచనం తద్ అతీవ శుశ్రువాన్ |
నరపతిః అభవత్ మహాన్ మహాత్మా
వ్యథిత మనాః ప్రచచాల చ అసనాత్ |౧-౧౯-౨౨|

ఇతి వాల్మీకి రామాయణే ఆది కావ్యే బాలకాండే ఏకోనవింశః సర్గః |౧-౧౯|

శ్రీమద్వాల్మీకియరామాయణే బాలకాండే వింశః సర్గః |౧-౨౦|
తత్ శ్రుత్వా రాజ శార్దూలో విశ్వామిత్రస్య భాషితం |
ముహూర్తం ఇవ నిస్సజ్ఞః సజ్ఞావాన్ ఇదం అబ్రవీత్ |౧-౨౦-౧|
ఊన షోడశ వర్షో మే రామో రాజీవ లోచనః |
న యుద్ధ యోగ్యతాం అస్య పశ్యామి సహ రాక్షసైః |౧-౨౦-౨|
ఇయం అక్షౌహిణీ సేనా యస్య అహం పతిః ఈశ్వరః |
అనయా సహితో గత్వా యోద్ధ అహం తైర్ నిశాచరైః |౧-౨౦-౩|
ఇమే శూరాః చ విక్రాంతా భృత్యాః మే అస్త్ర విశారదాః |
యోగ్యా రక్షోగణైః యోద్ధుం న రామం నేతుం అర్హసి |౧-౨౦-౪|
అహం ఏవ ధనుష్పాణిః గోప్తా సమర మూర్ధని |
యావత్ ప్రాణాన్ ధరిష్యామి తావత్ యోత్స్యే నిశాచరైః |౧-౨౦-౫|
నిర్విఘ్నా వ్రత చర్యా సా భవిష్యతి సురక్షితా |
అహం తత్ర ఆగమిష్యామి న రామం నేతుం అర్హసి |౧-౨౦-౬|
బాలో హి అకృత విద్యః చ న చ వేత్తి బలాబలం |
న చ అస్త్ర బల సంయుక్తో న చ యుద్ధ విశారదః |౧-౨౦-౭|
న చ అసౌ రక్షసా యోగ్యః కూట యుద్ధా హి రాక్షసా |
విప్రయుక్తో హి రామేణ ముహూర్తం అపి న ఉత్సహే |౧-౨౦-౮|
జీవితుం ముని శార్దూల న రామం నేతుం అర్హసి |
యది వా రాఘవం బ్రహ్మన్ నేతుం ఇచ్ఛసి సువ్రత |౧-౨౦-౯|
చతురంగ సమాయుక్తం మయా సహ చ తం నయ |
షష్టిః వర్ష సహస్రాణి జాతస్య మమ కౌశిక |౧-౨౦-౧౦|
కృచ్ఛ్రేణ ఉత్పాదితః చ అయం న రామం నేతుం అర్హసి |
చతుర్ణాం ఆత్మజానాం హి ప్రీతిః పరమికా మమ |౧-౨౦-౧౧|
జ్యేష్ఠే ధర్మ ప్రధానే చ న రామం నేతుం అర్హసి |
కిం వీర్యాః రాక్షసాః తే చ కస్య పుత్రాః చ కే చ తే |౧-౨౦-౧౨|
కథం ప్రమాణాః కే చ ఏతాన్ రక్షంతి మునిపుంగవ |
కథం చ ప్రతి కర్తవ్యం తేషాం రామేణ రక్షసాం |౧-౨౦-౧౩|
మామకైః వా బలైః బ్రహ్మన్ మయా వా కూట యోధినాం |
సర్వం మే శంస భగవన్ కథం తేషాం మయా రణే|౧-౨౦-౧౪|
స్థాతవ్యం దుష్ట భావానాం వీర్యోత్సిక్తా హి రాక్షసాః |
తస్య తద్ వచనం శ్రుత్వా విశ్వామిత్రో అభ్యభాషత |౧-౨౦-౧౫|
పౌలస్త్య వంశ ప్రభవో రావణో నామ రాక్షసః |
స బ్రహ్మణా దత్త వరః త్రైలోక్యం బాధతే భృశం |౧-౨౦-౧౬|
మహాబలో మహావీర్యో రాక్షసైః బహుభిః వృతః |
శ్రూయతే చ మహారాజా రావణో రాక్షస అధిపః |౧-౨౦-౧౭|
సాక్షాత్ వైశ్రవణ భ్రాతా పుత్రో విశ్రవసో మునేః |
యదా న ఖలు యజ్ఞస్య విఘ్న కర్తా మహాబలః |౧-౨౦-౧౮|
తేన సంచోదితౌ తౌ తు రాక్షసౌ చ మహాబలౌ |
మారీచః చ సుబాహుః చ యజ్ఞ విఘ్నం కరిష్యతః |౧-౨౦-౧౯|
ఇతి ఉక్తో మునినా తేన రాజా ఉవాచ మునిం తదా |
న హి శక్తో అస్మి సంగ్రామే స్థాతుం తస్య దురాత్మనః |౧-౨౦-౨౦|
స త్వం ప్రసాదం ధర్మజ్ఞ కురుష్వ మమ పుత్రకే |
మమ చ ఏవ అల్ప భాగ్యస్య దైవతం హి భవాన్ గురుః |౧-౨౦-౨౧|
దేవ దానవ గంధర్వా యక్షాః పతగ పన్నగాః|
న శక్తా రావణం సోఢుం కిం పునర్ మానవా యుధి |౧-౨౦-౨౨|
స తు వీర్యవతాం వీర్యం ఆదత్తే యుధి రావణః |
తేన చ అహం న శక్తోఽస్మి సంయోద్ధుం తస్య వా బలైః |౧-౨౦-౨౩|
సబలో వా మునిశ్రేష్ఠ సహితో వా మమ ఆత్మజైః |
కథం అపి అమర ప్రఖ్యం సంగ్రామాణాం అకోవిదం |౧-౨౦-౨౪|
బాలం మే తనయం బ్రహ్మన్ నైవ దాస్యామి పుత్రకం |
అథ కాల ఉపమౌ యుద్ధే సుతౌ సుందోపసుందయోః |౧-౨౦-౨౫|
యజ్ఞ విఘ్న కరౌ తౌ తే న ఏవ దాస్యామి పుత్రకం |
మారీచః చ సుబాహుః చ వీర్యవంతౌ సుశిక్షితౌ |౧-౨౦-౨౬|
తయోః అన్యతరం యోద్ధుం యాస్యామి స సుహృత్ గణః |
అన్యథా త్వనునేష్యామి భవంతం సహ బాంధవ |౧-౨౦-౨౭|
ఇతి నరపతి జల్పనాత్ ద్విజేంద్రం
కుశిక సుతం సుమహాన్ వివేశ మన్యుః |
సు హుత ఇవ మఖే అగ్నిః ఆజ్య సిక్తః
సమభవత్ ఉజ్వలితో మహర్షి వహ్నిః |౧-౨౦-౨౮|

ఇతి వాల్మీకి రామాయణే ఆది కావ్యే బాలకాండే వింశః సర్గః |౧-౨౦|

Om Tat Sat

(Continued ....)

(My humble salutations to the lotus feet of  Swamy jis, Philosophic Scholars and greatful to Wikisource  for the collection)