|
|
|
|
హృద్యయా స్నిగ్ధయా వాచా భర్తారం ఇదం అబ్రవీత్ |౩-౯-౧|
అధర్మం తు సుసూక్ష్మేణ విధినా ప్రాప్యతే మహాన్ |
నివృత్తేన చ శక్యో అయం వ్యసనాత్ కామజాద్ ఇహ |౩-౯-౨|
త్రీణి ఏవ వ్యసనాని అత్ర కామజాని భవంతి ఉత |
మిథ్యా వాక్యం తు పరమం తస్మాత్ గురుతరా ఉభౌ |౩-౯-౩|
పర దార అభిగమనం వినా వైరం చ రౌద్రతా |
మిథ్యా వాక్యం న తే భూతం న భవిష్యతి రాఘవ |౩-౯-౪|
కుతో అభిలషణం స్త్రీణాం పరేషాం ధర్మ నాశనం |
తవ నాస్తి మనుష్యేంద్ర న చ ఆభూత్ తే కదాచన |౩-౯-౫|
మనస్యపి తథా రామ న చ ఏతత్ విద్యతే క్వచిత్ |
స్వ దార నిరతః చ ఏవ నిత్యం ఏవ నృపాత్మజ |౩-౯-౬|
ధర్మిష్టః సత్య సంధః చ పితుః నిర్దేశ కారకః |
త్వయి ధర్మః చ సత్యం చ త్వయి సర్వం ప్రతిష్టితం |౩-౯-౭|
తచ్చ సర్వం మహాబాహో శక్యం వోఢుం జితేఇంద్రియైః |
తవ వశ్య ఇంద్రియత్వం చ జానామి శుభదర్శన |౩-౯-౮|
తృతీయం యద్ ఇదం రౌద్రం పర ప్రాణ అభిహింసనం |
నిర్వైరం క్రియతే మోహాత్ తత్ చ తే సముపస్థితం |౩-౯-౯|
ప్రతిజ్ఞాతః త్వయా వీర దణ్డకారణ్య వాసినాం |
ఋషీణాం రక్షణార్థాయ వధః సంయతి రక్షసాం |౩-౯-౧౦|
ఏతన్ నిమిత్తం చ వనం దణ్డకా ఇతి విశ్రుతం |
ప్రస్థితః త్వం సహ భ్రాత్రా ధృత బాణ శరాసనః |౩-౯-౧౧|
తతః త్వాం ప్రస్థితం దృష్ట్వా మమ చింత ఆకులం మనః |
త్వత్ వృత్తం చింతయంత్యా వై భవేత్ నిఃశ్రేయసం హితం |౩-౯-౧౨|
న హి మే రోచతే వీరః గమనం దణ్డకాన్ ప్రతి |
కారణం తత్ర వక్ష్యామి వదంత్యాః శ్రూయతాం మమ |౩-౯-౧౩|
త్వం హి బాణ ధనుష్పాణిః భ్రాత్రా సహ వనం గతః |
దృష్ట్వా వన చరాన్ సర్వాన్ కచ్చిత్ కుర్యాః శర వ్యయం |౩-౯-౧౪|
క్షత్రియాణాం ఇహ ధనుర్ హుతాశస్య ఇంధనాని చ |
సమీపతః స్థితం తేజో బలం ఉచ్ఛ్రయతే భృశం |౩-౯-౧౫|
పురా కిల మహాబాహో తపస్వీ సత్య వాక్ శుచిః |
కస్మిన్ చిత్ అభవత్ పుణ్యే వనే రత మృగ ద్విజే |౩-౯-౧౬|
తస్య ఏవ తపసో విఘ్నం కర్తుం ఇంద్రః శచీపతిః |
ఖడ్గ పాణిః అథ ఆగచ్ఛత్ ఆశ్రమం భట రూప ధృక్ |౩-౯-౧౭|
తస్మిన్ తత్ ఆశ్రమ పదే నిహితః ఖడ్గ ఉత్తమః |
స న్యాస విధినా దత్తః పుణ్యే తపసి తిష్ఠతః |౩-౯-౧౮|
స తత్ శస్త్రం అనుప్రాప్య న్యాస రక్షణ తత్పరః |
వనే తు విచరతి ఏవ రక్షన్ ప్రత్యయం ఆత్మనః |౩-౯-౧౯|
యత్ర గచ్ఛతి ఉపాదాతుం మూలాని చ ఫలాని చ |
న వినా యాతి తం ఖడ్గం న్యాస రక్షణ తత్పరః |౩-౯-౨౦|
నిత్యం శస్త్రం పరివహన్ క్రమేణ స తపోధనః |
చకార రౌద్రీం స్వాం బుద్ధిం త్యక్త్వా తపసి నిశ్చయం |౩-౯-౨౧|
తతః స రౌద్ర అభిరతః ప్రమత్తో అధర్మ కర్షితః | తస్య శస్త్రస్య సంవాసాత్ జగామ నరకం మునిః |౩-౯-౨౨|
ఏవం ఏతత్ పురా వృత్తం శస్త్ర సంయోగ కారణం |
అగ్ని సంయోగవత్ హేతుః శస్త్ర సంయోగ ఉచ్యతే |౩-౯-౨౩|
స్నేహాత్ చ బహుమానాత్ చ స్మారయే త్వాం న శిక్షయే |
న కథంచన సా కార్యా గృహీత ధనుషా త్వయా |౩-౯-౨౪|
బుద్ధిః వైరం వినా హంతుం రాక్షసాన్ దణ్డక ఆశ్రితాన్ |
అపరాధం వినా హంతుం లోకో వీర న కామయే |౩-౯-౨౫|
క్షత్రియాణాం తు వీరాణాం వనేషు నియతాత్మనాం |
ధనుషా కార్యం ఏతావత్ ఆర్తానాం అభిరక్షణం |౩-౯-౨౬|
క్వ చ శస్త్రం క్వ చ వనం క్వ చ క్షాత్రం తపః క్వ చ |
వ్యావిద్ధం ఇదం అస్మాభిః దేశ ధర్మః తు పూజ్యతాం |౩-౯-౨౭|
తదార్య కలుషా బుద్ధిః జాయతే శస్త్ర సేవనాత్ |
పునర్ గత్వాత్ తత్ అయోధ్యాయాం క్షత్ర ధర్మం చరిష్యసి |౩-౯-౨౮|
అక్షయా తు భవేత్ ప్రీతిః శ్వశ్రూ శ్వశురయోః మమ |
యది రాజ్యం హి సంన్యస్య భవేత్ త్వం నిరతో మునిః |౩-౯-౨౯|
ధర్మాత్ అర్థః ప్రభవతి ధర్మాత్ ప్రభవతే సుఖం |
ధర్మేణ లభతే సర్వం ధర్మ సారం ఇదం జగత్ |౩-౯-౩౦|
ఆత్మానం నియమైః తైః తైః కర్షయిత్వా ప్రయత్నతః |
ప్రాప్యతే నిపుణైః ధర్మో న సుఖాత్ లభతే సుఖం |౩-౯-౩౧|
నిత్యం శుచి మతిః సౌమ్య చర ధర్మం తపో వనే |
సర్వం హి విదితం తుభ్యం త్రైలోక్యం అపి తత్త్వతః |౩-౯-౩౨|
స్త్రీ చాపలాత్ ఏతత్ ఉదాహృతం మేధర్మం చ వక్తుం తవ కః సమర్థః |
విచార్య బుద్ధ్యా తు సహ అనుజేనయత్ రోచతే తత్ కురు మ అచిరేణ |౩-౯-౩౩|
ఇతి వాల్మీకి రామాయణే ఆది కావ్యే అరణ్యకాండే నవమః సర్గః |౩-౯|
|
|
|
|
శ్రుత్వా ధర్మే స్థితో రామః ప్రత్యువాచ జానకీం |౩-౧౦-౧|
హితం ఉక్తం త్వయా దేవి స్నిగ్ధయా సదృశం వచః |
కులం వ్యపదిశంత్యా చ ధర్మజ్ఞే జనక ఆత్మజే |౩-౧౦-౨|
కిం ను వక్ష్యామి అహం దేవి త్వయా ఏవ ఉక్తం ఇదం వచః |
క్షత్రియైః ధార్యతే చాపో న ఆర్త శబ్దో భవేద్ ఇతి |౩-౧౦-౩|
తే చ ఆర్తా దణ్డకారణ్యే మునయః సంశిత వ్రతాః |
మాం సీతే స్వయం ఆగమ్య శరణ్యాః శరణం గతాః |౩-౧౦-౪|
వసంతః కాల కాలేషు వనే మూల ఫల అశనాః |
న లభంతే సుఖం భీరు రాక్షసైః క్రూర కర్మభిః |౩-౧౦-౫|
భక్ష్యంతే రాక్షసైః భీమైః నర మాంసోపజీవిభిః |
తే భక్ష్యమాణా మునయో దణ్డకారణ్య వాసినః |౩-౧౦-౬|
అస్మాన్ అభ్యవపద్య ఇతి మాం ఊచుర్ ద్విజ సత్తమాః |
మయా తు వచనం శ్రుత్వా తేషాం ఏవం ముఖాత్ చ్యుతం |౩-౧౦-౭|
కృత్వా వచన శుశ్రుషాం వాక్యం ఏతత్ ఉదాహృతం |
ప్రసీదంతు భవంతో మే హ్రీః ఏషా తు మమ అతులా |౩-౧౦-౮|
యద్ ఈదృశైః అహం విప్రైః ఉపస్థేయైః ఉపస్థితః |
కిం కరోమి ఇతి చ మయా వ్యాహృతం ద్విజ సంనిధౌ |౩-౧౦-౯|
సర్వైః ఏవ సమాగమ్య వాక్ ఇయం సముదాహృతా |
రాక్షసైః దణ్డకారణ్యే బహుభిః కామ రూపిభిః |౩-౧౦-౧౦|
అర్దితాః స్మ భృశం రామ భవాన్ నః తత్ర రక్షతు |
హోమ కాలే తు సంప్రాప్తే పర్వ కాలేషు చ అనఘ |౩-౧౦-౧౧|
ధర్షయంతి సుదుర్ధర్షా రాక్షసాః పిశిత అశనాః |
రాక్షసైః ధర్షితానాం చ తాపసానాం తపస్వినాం |౩-౧౦-౧౨|
గతిం మృగయమాణానాం భవాన్ నః పరమా గతిః |
కామం తపః ప్రభావేణ శక్తా హంతుం నిశాచరాన్ |౩-౧౦-౧౩|
చిరార్జితం న చ ఇచ్ఛామః తపః ఖణ్డయితుం వయం |
బహు విఘ్నం తపో నిత్యం దుఃశ్చరం చైవ రాఘవ |౩-౧౦-౧౪|
తేన శాపం న ముంచామో భక్ష్యమాణాః చ రాక్షసైః |
తద్ అర్ద్యమానాన్ రక్షోభిః దణ్డకారణ్య వాసిభిః |౩-౧౦-౧౫|
రక్ష నః త్వం సహ భ్రాత్రా త్వం నాథా హి వయం వనే |
మయా చ ఏతత్ వచః శ్రుత్వా కార్త్స్న్యేన పరిపాలనం |౩-౧౦-౧౬|
ఋషీణాం దణ్డకారణ్యే సంశ్రుతం జనకాత్మజే |
సంశ్రుత్య న చ శక్ష్యామి జీవమానః ప్రతిశ్రవం |౩-౧౦-౧౭|
మునీనాం అన్యథా కర్తుం సత్యం ఇష్టం హి మే సదా |
అపి అహం జీవితం జహ్యాం త్వాం వా సీతే స లక్ష్మణాం |౩-౧౦-౧౮|
న తు ప్రతిజ్ఞాం సంశ్రుత్య బ్రాహ్మణేభ్యో విశేషతః |
తత్ అవశ్యం మయా కార్యం ఋషీణాం పరిపాలనం |౩-౧౦-౧౯|
అనుక్తేన అపి వైదేహి ప్రతిజ్ఞాయ కథం పునః |
మమ స్నేహాత్ చ సౌహార్దాత్ ఇదం ఉక్తం త్వయా వచః |౩-౧౦-౨౦|
పరితుష్టో అస్మి అహం సీతే న హి అనిష్టో అనుశాస్యతే |
సదృశం చ అనురూపం చ కులస్య తవ శోభనే |
సధర్మ చారిణీ మే త్వం ప్రాణేభ్యో అపి గరీయసీ |౩-౧౦-౨౧|
ఇతి ఏవం ఉక్త్వా వచనం మహాత్మాసీతాం ప్రియాం మైథిల రాజ పుత్రీం |
రామో ధనుష్మాన్ సహ లక్ష్మణేనజగామ రమ్యాణి తపో వనాని |౩-౧౦-౨౨|
ఇతి వాల్మీకి రామాయణే ఆది కావ్యే అరణ్యకాండే దశమః సర్గః |౩-౧౦|
|
|
|
|
పృష్ఠతః తు ధనుష్పాణిః లక్ష్మణః అనుజగామ హ |౩-౧౧-౧|
తౌ పశ్యమానౌ వివిధాన్ శైల ప్రస్థాన్ వనాని చ |
నదీః చ వివిధా రమ్యా జగ్మతుః సహ సీతయా |౩-౧౧-౨|
సారసాన్ చక్రవాకాం చ నదీ పులిన చారిణః |
సరాంసి చ సపద్మాని యుతాని జలజైః ఖగైః |౩-౧౧-౩|
యూథ బద్ధాం చ పృషతాన్ మద ఉన్మత్తాన్ విషాణినః |
మహిషాం చ వరాహాం చ గజాం చ ద్రుమ వైరిణః |౩-౧౧-౪|
తే గత్వా దూరం అధ్వానం లంబమానే దివాకరే |
దదృశుః సహితా రంయం తటాకం యోజన ఆయుతం |౩-౧౧-౫|
పద్మ పుష్కర సంబాధం గజ యూథైః అలంకృతం |
సారసైః హంస కాదంబైః సంకులం జల జాతిభిః |౩-౧౧-౬|
ప్రసన్న సలిలే రమ్యే తస్మిన్ సరసి శుశ్రువే |
గీత వాదిత్ర నిర్ఘోషో న తు కశ్చన దృశ్యతే |౩-౧౧-౭|
తతః కౌతూహలాత్ రామో లక్ష్మణః చ మహారథః |
మునిం ధర్మభృతం నామ ప్రష్టుం సముపచక్రమే |౩-౧౧-౮|
ఇదం అత్యద్భుతం శ్రుత్వా సర్వేషాం నో మహామునే |
కౌతూహలం మహత్ జాతం కిం ఇదం సాధు కథ్యతాం |౩-౧౧-౯|
తేన ఏవం ఉక్తో ధర్మాత్మా రాఘవేణ మునిః తదా |
ప్రభావం సరసః క్షిప్రం ఆఖ్యాతుం ఉపచక్రమే |౩-౧౧-౧౦|
ఇదం పంచ అప్సరో నామ తటాకం సార్వ కాలికం |
నిర్మితం తపసా రామ మునినా మాణ్డకర్ణినా |౩-౧౧-౧౧|
స హి తేపే తపః తీవ్రం మాణ్డకర్ణిః మహామునిః |
దశ వర్ష సహస్రాణి వాయు భక్షో జలాశయే |౩-౧౧-౧౨|
తతః ప్రవ్యథితాః సర్వే దేవాః స అగ్ని పురోగమాః |
అబ్రువన్ వచనం సర్వే పరస్పర సమాగతాః |౩-౧౧-౧౩|
అస్మకం కస్యచిత్ స్థానం ఏష ప్రార్థయతే మునిః |
ఇతి సంవిగ్న మనసః సర్వే తత్ర దివౌకసః |౩-౧౧-౧౪|
తతః కర్తుం తపో విఘ్నం సర్వ దేవైః నియోజితాః |
ప్రధాన అప్సరసః పంచ విద్యుత్ చలిత వర్చసః |౩-౧౧-౧౫|
అప్సరోభిః తతః తాభిః మునిః దృష్ట పరావరః |
నీతో మదన వశ్యత్వం దేవానాం కార్య సిద్ధయే |౩-౧౧-౧౬|
తాః చైవ అప్సరసః పంచ మునేః పత్నీత్వం ఆగతాః |
తటాకే నిర్మితం తాసాం తస్మిన్ అంతర్హితం గృహం |౩-౧౧-౧౭|
తత్ర ఏవ అప్సరసః పంచ నివసంత్యో యథా సుఖం |
రమయంతి తపోయోగాత్ మునిం యౌవనం ఆస్థితం |౩-౧౧-౧౮|
తాసాం సంక్రీడ మానానాం ఏష వాదిత్ర నిఃస్వనః |
శ్రూయతే భూషణ ఉన్మిశ్రః గీత శబ్దః మనోహరః |౩-౧౧-౧౯|
ఆశ్చర్యం ఇతి తస్య ఏతద్ వచనం భావితాత్మనః |
రాఘవః ప్రతిజగ్రాహ సహ భ్రాత్రా మహా యశాః |౩-౧౧-౨౦|
ఏవం కథయమానః స దదర్శ ఆశ్రమ మణ్డలం |
కుశ చీర పరిక్షిప్తం బ్రాహ్మ్యా లక్ష్మ్యా సమావృతం |౩-౧౧-౨౧|
ప్రవిశ్య సహ వైదేహ్యా లక్ష్మణేన చ రాఘవః |
తదా తస్మిన్ స కాకుత్స్థః శ్రీమతి ఆశ్రమ మణ్డలే |౩-౧౧-౨౨|
ఉషిత్వా స సుఖం తత్ర పూర్జ్యమానో మహర్షిభిః |
జగామ చ ఆశ్రమాన్ తేషాం పర్యాయేణ తపస్వినాం |౩-౧౧-౨౩|
యేషాం ఉషితవాన్ పూర్వం సకాశే స మహాస్త్రవిత్ |
క్వచిత్ పరిదశాన్ మాసాన్ ఏక సంవత్సరం క్వచిత్ |౩-౧౧-౨౪|
క్వచిత్ చ చతురో మాసాన్ పంచ షట్ చ పరాన్ క్వచిత్ |
అపరత్ర అధికాన్ మాసాన్ అధ్యర్ధం అధికం క్వచిత్ |౩-౧౧-౨౫|
త్రీన్ మాసాన్ అష్ట మాసాన్ చ రాఘవో న్యవసత్ సుఖం |
తత్ర సంవసతః తస్య మునీనాం ఆశ్రమేషు వై |౩-౧౧-౨౬|
రమతః చ ఆనుకూల్యేన యయుః సంవత్సరా దశ |
పరిసృత్య చ ధర్మజ్ఞః రాఘవః సహ సీతయా |౩-౧౧-౨౭|
సుతీక్ష్ణస్య ఆశ్రమం శ్రీమాన్ పునర్ ఏవ ఆజగామ హ |
స తం ఆశ్రమం ఆగమ్య మునిభిః పరిపూజితః |౩-౧౧-౨౮|
తత్ర అపి న్యవసత్ రామః కంచిత్ కాలం అరిందమః |
అథ ఆశ్రమస్థో వినయాత్ కదాచిత్ తం మహామునిం |౩-౧౧-౨౯|
ఉపాసీనః స కాకుత్స్థః సుతీక్ష్ణం ఇదం అబ్రవీత్ |
అస్మిన్ అరణ్యే భగవన్ అగస్త్యో మునిసత్తమః |౩-౧౧-౩౦|
వసతి ఇతి మయా నిత్యం కథాః కథయతాం శ్రుతం |
న తు జానామి తం దేశం వనస్య అస్య మహత్తయా |౩-౧౧-౩౧|
కుత్ర ఆశ్రమ పదం పుణ్యం మహర్షేః తస్య ధీమతః |
ప్రసాద అర్థం భగవతః సానుజః సహ సీతయా |౩-౧౧-౩౨|
అగస్త్యం అభిగచ్ఛేయం అభివాదయితుం మునిం |
మనోరథో మహాన్ ఏష హృది పరివర్తతే |౩-౧౧-౩౩|
యది అహం తం మునివరం శుశ్రూషేయం అపి స్వయం |
ఇతి రామస్య స మునిః శ్రుత్వా ధర్మాత్మనో వచః |౩-౧౧-౩౪|
సుతీక్ష్ణః ప్రత్యువాచ ఇదం ప్రీతో దశరథాత్మజం |
అహం అపి ఏతద్ ఏవ త్వాం వక్తు కామః స లక్ష్మణం |౩-౧౧-౩౫|
అగస్త్యం అభిగచ్ఛ ఇతి సీతయా సహ రాఘవ |
దిష్ట్యా తు ఇదానీం అర్థే అస్మిన్ స్వయం ఏవ బ్రవీషి మాం |౩-౧౧-౩౬|
అయం ఆఖ్యామి తే రామ యత్ర అగస్త్యో మహామునిః |
యోజనాని ఆశ్రమాత్ తాత యాహి చత్వారి వై తతః |
దక్షిణేన మహాన్ శ్రీమాన్ అగస్త్య భ్రాతుర్ ఆశ్రమః |౩-౧౧-౩౭|
స్థలీ ప్రాయ వనోద్దేశే పిప్పలీ వన శోభితే |
బహు పుష్ప ఫలే రమ్యే నానా విహగ నాదితే |౩-౧౧-౩౮|
పద్మిన్యో వివిధాః తత్ర ప్రసన్న సలిల ఆశయాః |
హంస కారణ్డవ ఆకీర్ణాః చక్రవాక ఉపశోభితాః |౩-౧౧-౩౯|
తత్ర ఏకాం రజనీం వ్యుష్య ప్రభాతే రామ గమ్యతాం |
దక్షిణాం దిశం ఆస్థాయ వన షణ్డస్య పార్శ్వతః |౩-౧౧-౪౦|
తత్ర అగస్త్య ఆశ్రమ పదం గత్వా యోజనం అంతరం |
రమణీయే వనోద్దేశే బహు పాదప శోభితే |౩-౧౧-౪౧|
రంస్యతే తత్ర వైదేహీ లక్ష్మణః చ త్వయా సహ |
స హి రమ్యో వనోఉద్దేశో బహు పాదప సంయుతః |౩-౧౧-౪౨|
యది బుద్ధిః కృతా ద్రష్టుం అగస్త్యం తం మహామునిం |
అద్య ఏవ గమనే బుద్ధిం రోచయస్వ మహామతే |౩-౧౧-౪౩|
ఇతి రామో మునేః శ్రుత్వా సహ భ్రాత్రా అభివాద్య చ |
ప్రతస్థే అగస్త్యం ఉద్దిశ్య సానుగః సహ సీతయా |౩-౧౧-౪౪|
పశ్యన్ వనాని చిత్రాణి పర్వతాం చ అభ్ర సంనిభాన్ |
సరాంసి సరితః చైవ పథి మార్గ వశ అనుగతాన్ |౩-౧౧-౪౫|
సుతీక్ష్ణేన ఉపదిష్టేన గత్వా తేన పథా సుఖం |
ఇదం పరమ సంహృష్టో వాక్యం లక్ష్మణం అబ్రవీత్ |౩-౧౧-౪౬|
ఏతద్ ఏవ ఆశ్రమ పదం నూనం తస్య మహాత్మనః |
అగస్త్యస్య మునేర్ భ్రాతుర్ దృశ్యతే పుణ్య కర్మణః |౩-౧౧-౪౭|
యథా హి ఇమే వనస్య అస్య జ్ఞాతాః పథి సహస్రశః |
సంనతాః ఫల భరేణ పుష్ప భారేణ చ ద్రుమాః |౩-౧౧-౪౮|
పిప్పలీనాం చ పక్వానాం వనాద్ అస్మాద్ ఉపాగతః |
గంధో అయం పవన ఉత్క్షిప్తః సహసా కటుకోదయః |౩-౧౧-౪౯|
తత్ర తత్ర చ దృశ్యంతే సంక్షిప్తాః కాష్ఠ సంచయాః |
లూనాః చ పరిదృశ్యంతే దర్భా వైదూర్య వర్చసః |౩-౧౧-౫౦|
ఏతత్ చ వన మధ్యస్థం కృష్ణ అభ్ర శిఖర ఉపమం |
పావకస్య ఆశ్రమస్థస్య ధూమాగ్రం సంప్రదృశ్యతే |౩-౧౧-౫౧|
వివిక్తేషు చ తీర్థేషు కృత స్నానా ద్విజాతయః |
పుష్ప ఉపహారం కుర్వంతి కుసుమైః స్వయం ఆర్జితైః |౩-౧౧-౫౨|
తతః సుతీక్ష్ణస్య వచనం యథా సౌమ్య మయా శ్రుతం |
అగస్త్యస్య ఆశ్రమో భ్రాతుర్ నూనం ఏష భవిష్యతి |౩-౧౧-౫౩|
నిగృహ్య తరసా మృత్యుం లోకానాం హిత కామ్యయా |
యస్య భ్రాత్రా కృతా ఇయం దిక్ శరణ్యా పుణ్య కర్మణా |౩-౧౧-౫౪|
ఇహ ఏకదా కిల క్రూరో వాతాపిః అపి చ ఇల్వలః |
భ్రాతరౌ సహితౌ ఆస్తాం బ్రాహ్మణఘ్నౌ మహా అసురౌ |౩-౧౧-౫౫|
ధారయన్ బ్రాహ్మణం రూపం ఇల్వలః సంస్కృతం వదన్ |
ఆమంత్రయతి విప్రాన్ స శ్రాద్ధం ఉద్దిశ్య నిర్ఘృణః |౩-౧౧-౫౬|
భ్రాతరం సంస్కృతం కృత్వా తతః తం మేష రూపిణం |
తాన్ ద్విజాన్ భోజయామాస శ్రాద్ధ దృష్టేన కర్మణా |౩-౧౧-౫౭|
తతో భుక్తవతాం తేషాం విప్రాణాం ఇల్వలో అబ్రవీత్ |
వాతాపే నిష్క్రమస్వ ఇతి స్వరేణ మహతా వదన్ |౩-౧౧-౫౮|
తతో భ్రాతుర్ వచః శ్రుత్వా వాతాపిః మేషవత్ నదన్ |
భిత్త్వా భిత్వా శరీరాణి బ్రాహ్మణానాం వినిష్పతత్ |౩-౧౧-౫౯|
బ్రాహ్మణానాం సహస్రాణి తైః ఏవం కామ రూపిభిః |
వినాశితాని సంహత్య నిత్యశః పిశిత అశనైః |౩-౧౧-౬౦|
అగస్త్యేన తదా దేవైః ప్రార్థితేన మహర్షిణా |
అనుభూయ కిల శ్రాద్ధే భక్షితః స మహా అసురః |౩-౧౧-౬౧|
తతః సంపన్నం ఇతి ఉక్త్వా దత్త్వా హస్తే అవనేజనం |
భ్రాతరం నిష్క్రమస్వ ఇతి చ ఇల్వలః సమభాషత |౩-౧౧-౬౨|
స తదా భాషమాణం తు భ్రాతరం విప్ర ఘాతినం |
అబ్రవీత్ ప్రహసన్ ధీమాన్ అగస్త్యో ముని సత్తమః |౩-౧౧-౬౩|
కుతో నిష్క్రమితుం శక్తిర్ మయా జీర్ణస్య రక్షసః |
భ్రాతుః తే మేష రూపస్య గతస్య యమ సాదనం |౩-౧౧-౬౪|
అథ తస్య వచః శ్రుత్వా భ్రాతుర్ నిధన సంశ్రితం |
ప్రధర్షయితుం ఆరేభే మునిం క్రోధాత్ నిశా చరః |౩-౧౧-౬౫|
సో అభ్యద్రవత్ ద్విజేంద్రం తం మునినా దీప్త తేజసా |
చక్షుషా అనల కల్పేన నిర్దగ్ధో నిధనం గతః |౩-౧౧-౬౬|
తస్య అయం ఆశ్రమో భ్రాతుః తటాక వన శోభితః |
విప్ర అనుకంపయా యేన కర్మ ఇదం దుష్కరం కృతం |౩-౧౧-౬౭|
ఏవం కథయమానస్య తస్య సౌమిత్రిణా సహ |
రామస్య అస్తం గతః సూర్యః సంధ్యా కాలో అభ్యవర్తత |౩-౧౧-౬౮|
ఉపాస్య పశ్చిమాం సంధ్యాం సహ భ్రాత్రా యథా విధి |
ప్రవివేశ ఆశ్రమ పదం తం ఋషిం చ అభ్యవాదయత్ |౩-౧౧-౬౯|
సమ్యక్ ప్రతిగృహీతః తు మునినా తేన రాఘవః |
న్యవసత్ తాం నిశాం ఏకాం ప్రాశ్య మూల ఫలాని చ |౩-౧౧-౭౦|
తస్యాం రాత్ర్యాం వ్యతీతాయాం ఉదితే రవి మణ్డలే |
భ్రాతరం తం అగస్త్యస్య ఆమంత్రయత రాఘవః |౩-౧౧-౭౧|
అభివాదయే త్వాం భగవన్ సుఖం స్మ ఉష్యతో నిశాం |
ఆమంత్రయే త్వాం గచ్ఛామి గురుం తే ద్రష్టుం అగ్రజం |౩-౧౧-౭౨|
గమ్యతాం ఇతి తేన ఉక్తో జగామ రఘు నందనః |
యథా ఉద్దిష్టేన మార్గేణ వనం తత్ చ అవలోకయన్ |౩-౧౧-౭౩|
నీవారాన్ పనసాన్ సాలాన్ వంజులాన్ తినిశాన్ తథా |
చిరి బిల్వాన్ మధూకాన్ చ బిల్వాన్ అథ చ తిందుకాన్ |౩-౧౧-౭౪|
పుష్పితాన్ పుష్పిత అగ్రాభిర్ లతాభిర్ ఉపశోభితాన్ |
దదర్శ రామః శతశః తత్ర కాంతార పాదపాన్ |౩-౧౧-౭౫|
హస్తి హస్తైః విమృదితాన్ వానరైః ఉపశోభితాన్ |
మత్తైః శకుని సంఘైః చ శతశః ప్రతి నాదితాన్ |౩-౧౧-౭౬|
తతో అబ్రవీత్ సమీపస్థం రామో రాజీవ లోచనః |
పృష్ఠతో అనుగతం వీరం లక్ష్మణం లక్ష్మివర్ధనం |౩-౧౧-౭౭|
స్నిగ్ధ పత్రా యథా వృక్షా యథా క్షాంతా మృగ ద్విజాః |
ఆశ్రమో న అతిదూరస్థో మహర్షేర్ భావిత ఆత్మనః |౩-౧౧-౭౮|
అగస్త్య ఇతి విఖ్యాతో లోకే స్వేన ఏవ కర్మణా |
ఆశ్రమో దృశ్యతే తస్య పరిశ్రాంత శ్రమ అపహః |౩-౧౧-౭౯|
ప్రాజ్య ధూమ ఆకుల వనః చీర మాలా పరిష్కృతః |
ప్రశాంత మృగ యూథః చ నానా శకుని నాదితః |౩-౧౧-౮౦|
నిగృహ్య తరసా మృత్యుం లోకానాం హిత కామ్యయా |
దక్షిణా దిక్ కృతా యేన శరణ్యా పుణ్య కర్మణా |౩-౧౧-౮౧|
తస్య ఇదం ఆశ్రమ పదం ప్రభావాద్ యస్య రాక్షసైః |
దిక్ ఇయం దక్షిణా త్రాసాద్ దృశ్యతే న ఉపభుజ్యతే |౩-౧౧-౮౨|
యదా ప్రభృతి చ ఆక్రాంతా దిగ్ ఇయం పుణ్య కర్మణా |
తదా ప్రభృతి నిర్ వైరాః ప్రశాంతా రజనీ చరాః |౩-౧౧-౮౩|
నామ్నా చ ఇయం భగవతో దక్షిణా దిక్ ప్రదక్షిణా |
ప్రథితా త్రిషు లోకేషు దుర్ధర్షా క్రూర కర్మభిః |౩-౧౧-౮౪|
మార్గం నిరోద్ధుం సతతం భాస్కరస్య అచల ఉత్తమః |
సందేశం పాలయన్ తస్య వింధ్య శైలో న వర్ధతే |౩-౧౧-౮౫|
అయం దీర్ఘ ఆయుషః తస్య లోకే విశ్రుత కర్మణః |
అగస్త్యస్య ఆశ్రమః శ్రీమాన్ వినీత మృగ సేవితః |౩-౧౧-౮౬|
ఏష లోక అర్చితః సాధుః హితే నిత్యం రతః సతాం |
అస్మాన్ అధిగతాన్ ఏష శ్రేయసా యోజయిష్యతి |౩-౧౧-౮౭|
ఆరాధయిష్యామి అత్ర అహం అగస్త్యం తం మహామునిం |
శేషం చ వన వాసస్య సౌమ్య వత్స్యామి అహం ప్రభో |౩-౧౧-౮౮|
అత్ర దేవాః సగంధర్వాః సిద్ధాః చ పరమ ఋషయః |
అగస్త్యం నియత ఆహారాః సతతం పర్యుపాసతే |౩-౧౧-౮౯|
న అత్ర జీవేత్ మృషావాదీ క్రూరో వా యది వా శఠః |
నృశంసః పాప వృత్తో వా మునిః ఏష తథా విధః |౩-౧౧-౯౦|
అత్ర దేవాః చ యక్షాః చ నాగాః చ పతగైః సహ |
వసంతి నియత ఆహారా ధర్మం ఆరాధయిష్ణవః |౩-౧౧-౯౧|
అత్ర సిద్ధా మహాత్మానో విమానైః సూర్య సన్నిభైః |
త్యక్త్వా దేహాన్ నవైర్ దేహైః స్వర్ యాతాః పరమ ఋషయః |౩-౧౧-౯౨|
యక్షత్వం అమరత్వం చ రాజ్యాని వివిధాని చ |
అత్ర దేవాః ప్రయచ్ఛంతి భూతైః ఆరాధితాః శుభైః |౩-౧౧-౯౩|
ఆగతాః స్మ ఆశ్రమ పదం సౌమిత్రే ప్రవిశ అగ్రతః |
నివేదయ ఇహ మాం ప్రాప్తం ఋషయే సహ సీతయా |౩-౧౧-౯౪|
ఇతి వాల్మీకి రామాయణే ఆది కావ్యే అరణ్యకాండే ఏకాదశః సర్గః |౩-౧౧|
Om Tat Sat
(Continued
....)
(My humble salutations to the
lotus feet of Swamy jis, Philosophic
Scholars and greatful to Wikisource for
the collection)
0 comments:
Post a Comment